[prenta uppsett í dálka] 116. fundur, 126. lþ.
Össur Skarphéðinsson (andsvar):
Herra forseti. Hv. þm. Hjálmar Árnason sagði áðan að hraði framfara í fjarskiptum væri mikill. Það kann að vera rétt en hann er samt ekki jafnmikill í fjarskiptunum og hraðinn er á skoðanaskiptum hv. þm.
Herra forseti. Ég vil mælast til þess við hv. þm. að hafa aðgát í nærveru sálar og biðja menn um að húðstrýkja ekki hv. þm. eins og búið er að gera hér í dag. Við verðum að virða honum það til vorkunnar að það kann að vera langt í gagnaflutningakerfinu hjá honum en eins og bent hefur verið á, hefur hann uppgötvað að sett voru lög um fjarskipti hér áður fyrr. Þau lög, sem voru í gildi þegar hv. þm. var með yfirlýsingar sínar, notar hann núna til þess að skipta algjörlega um skoðun.
Hver var það sem sagði, herra forseti: ,,Fákeppni er einfaldlega talin geta drepið í dróma alla eðlilega þróun og skapað hinu drottnandi fyrirtæki hættulega einokunaraðstöðu er bitni endanlega á veskjum neytenda.``
Hver var það sem sagði: ,,Of stórt og ráðandi fyrirtæki er einfaldlega talið hafa skaðleg áhrif á þróun markaðar og beinlínis geta unnið gegn hagsmunum neytenda til lengri tíma litið.``
Svo kemur þessi hv. þm. og stendur hér á hóli drambsins og fellur beint á bólakaf í dýið. Og ekki í fyrsta skiptið.
