Magnús Stefánsson (andsvar):
Herra forseti. Samkvæmt fjarskiptalögum er gert ráð fyrir því að jöfnun komi í gegnum rekstur með ákveðnu jöfnunargjaldi. Það er þannig alveg skýrt. Ég er hins vegar klár á því að afstaða Vinstri hreyfingarinnar -- græns framboðs er alveg skýr í málinu. Þeir vilja ekki selja. Ég meðtek það eins og það er. Ég ætla að sjálfsögðu ekki að gera neinar athugasemdir við það.
Ég legg áherslu á það sem ég hef sagt, að samkeppnin er drifkraftur þróunar og uppbyggingar. Við höfum séð það á þeim árum sem liðin eru frá því að samkeppnin var innleidd á fjarskiptasviði. Ég held að menn hljóti að geta verið sammála um þessar staðreyndir, að samkeppnin sem hér hefur mótast, er að mótast og verður vonandi sem mest á þessu sviði, er drifkrafturinn í framþróun og uppbyggingu á fjarskiptasviði.