Sigríður A. Þórðardóttir:
Herra forseti. Við lifum á spennandi tímum. Ný öld er gengin í garð. Nýr tími að taka við með breyttum viðhorfum og öðruvísi viðfangsefnum.
Á undanförnum árum hefur verið lögð áhersla á uppbyggingu menntunar og vísinda í landinu og m.a. hefur verið sett ný löggjöf um öll skólastig. Það skiptir auðvitað sköpum fyrir stöðu okkar Íslendinga í samfélagi þjóðanna hvernig staðið er að verki í þessum málaflokki. Við erum í harðri samkeppni við aðrar þjóðir á öllum sviðum. Í þeirri glímu er góð menntun best til árangurs.
Það eru að verða grundvallarbreytingar á atvinnulífi Íslendinga þar sem hagvöxt má í vaxandi mæli rekja til þekkingar fremur en náttúrulegra auðlinda. Við eigum hiklaust að setja metnað okkar í að skara fram úr á þeim sviðum sem við þekkjum best, jafnframt því að hasla okkur völl í nýjum greinum eins og við höfum verið að gera í hátæknigreinum og upplýsingatækni. Ný fyrirtæki á þeim sviðum hafa gefið ungum íslenskum vísindamönnum tækifæri til að starfa hér heima. Nú er svo komið að það vantar fleira vísinda- og tæknimenntað fólk til vinnu hér á landi.
Þetta sýnir í hnotskurn hvernig alþjóðavæðingin, sem nú gengur yfir, hefur leitt til þess að viðhorf og viðfangsefni vísinda og tækni breytast hratt hér eins og annars staðar. Háskólarnir eru nú að vinna að því að efla rannsóknanám og það er gott. Brýnasta verkefnið sem við stöndum frammi fyrir er að auka frelsi í rannsóknum, að atvinnulífið komi þar öflugar að verki og ríkið leggi fyrst og fremst áherslu á að efla grunnrannóknir og menntun.
Áðan kom fram í máli hæstv. menntmrh. að heildarumfang rannsókna hér á Íslandi er með því mesta sem þekkist innan OECD. Þar erum við nú í 6. sæti árið 1999 og færum okkur úr því 13. frá 1997. Það er því alveg ljóst að það er rangt sem hefur verið staðhæft hér að í þessum efnum sé slaklega að verki staðið. Þessar tölur sýna svo ekki verður um villst að við erum á réttri leið.