[prenta uppsett í dálka] 120. fundur, 126. lþ.
Frsm. utanrmn. (Tómas Ingi Olrich) (andsvar):
Herra forseti. Varðandi athugasemdir hv. þm. Steingríms J. Sigfússonar, þá hygg ég að lýsing hans á aðstæðum öllum í sambandi við þá breytingu sem hér er verið að gera sé rétt, enda er hún byggð á athugasemdum við þáltill. Hins vegar er rétt að geta þess að Noregur og Ísland og Liechtenstein hafa aðkomu að ákvarðanatökunni, þó að ákvarðanirnar séu teknar af ráðherraráðinu og ljóst að Íslendingar og Norðmenn hafa ekki aðkomu að ráðherraráðinu.
Það breytir því ekki að Íslendingar hafa sjálfstæðan ákvörðunarrétt um það hvort þeir sætti sig við þær ákvarðanir sem teknar eru. En á meðan við erum þátttakendur í þessu samstarfi, beitingu og þróun Schengen-gerðanna, þá hvílir þessi skylda á Íslendingum, það er alveg hárrétt. Ef aðstæður þróast þannig að upp koma mál af því tagi að Íslendingar geti ekki sætt sig við, þá geta þeir gengið út úr samstarfinu.
