Ögmundur Jónasson:
Herra forseti. Það hefur ekki farið fram hjá neinum að undanfarna daga hafa útgerðarmenn verið að herða róðurinn í áróðursstríði sínu gegn sjómönnum. Talsmenn þeirra hafa komið fram í fjölmiðlum og haft þar í hótunum við sjómenn.
Því er vissulega ekki að neita að menn hafa óttast að þess kynni að vera skammt að bíða að ríkisstjórnin skæri húsbændur sína í LÍÚ niður úr þeirri snöru sem þeir hafa komið sér í með óbilgirni sinni. Við höfðum fallist á að hér yrði svokallaður útbýtingarfundur í dag. En, herra forseti, það hvarflaði ekki að nokkrum manni að hann yrði nýttur á eins ósvífinn hátt og raun ber hér vitni.
Ég vil mótmæla þessum vinnubrögðum og mótmæla því sem til stendur að gera gagnvart íslensku sjómannastéttinni.