Frsm. 1. minni hluta samgn. (Lúðvík Bergvinsson) (andsvar):
Virðulegi forseti. Mér er bæði ljúft og skylt að svara þeirri spurningu sem hér er borin upp og kannski kemur svarið fram í brtt., þ.e. við leggjum til að fyrirtækinu verði skipt upp. Við leggjum til að eignarhlutar í öllu öðru en grunnnetinu verði seldir og við leggjum til að ríkið haldið þessu eftir.
Það breytir ekki hinu að skoðun mín er sú að það yrði væntanlega í framtíðinni einnig selt. En það sem við leggjum til núna er samkvæmt brtt. það að fyrirtækinu verði skipt upp, að samkeppnissvið þess --- og þar á ég við símaþjónustuna, GSM-deildina, hlutabréfasjóðinn og allt annað en grunnnetið verði selt en fyrst í stað verði grunnnetið í eigu ríkisins, þó að það sé mín skoðun og hefur verið mín skoðun að eftir afnám einkaleyfanna, eftir að ríkið afnam einkaleyfi ríkisfyrirtækjanna stóru í fjarskiptum þá sé einboðið að ríkið muni draga sig út af þeim markaði.