[prenta uppsett í dálka] 127. fundur, 126. lþ.
Kristján L. Möller (andsvar):
Hæstv. forseti. Hv. þm. svaraði ekki einu einasta atriði af því sem ég var að spyrja hann um heldur fer hér eins og köttur í kringum heitan graut. Það er táknrænt fyrir framsóknarmenn að gera þetta. Það eru skýr skilaboð frá framsóknarmönnum til meginþorra íbúa á landsbyggðinni sem ekki eru komnir með ljósleiðara til sín og þar sem ekki er á dagskrá að leggja hann á næstunni, að þeir eigi að notast við moldarreiðgötur meðan aðrir geta fengið miklu hraðari og öflugri net.
Ég tók eitt dæmi áðan um kvikmyndina. Þar tekur þetta fjórar sekúndur í gegnum ljósleiðaratengi en átta klukkustundir með hinni aðferðinni. Ég hefði viljað gera athugasemdir við ótal atriði í ræðu hv. þm. og mun gera það í ræðu minni hér á eftir og enn fremur fara betur yfir sinnaskipti Framsfl. sem lét Sjálfstfl. í þessu máli eins og svo mörgum öðrum teyma sig í þá ógöngur sem þeir eru komnir í núna.
