Frsm. 2. minni hluta efh.- og viðskn. (Ögmundur Jónasson) (andsvar):
Herra forseti. Hv. þm. Össur Skarphéðinsson vék réttilega að því að eðlilegt væri að ræða efnahagslega þætti þessa máls og saknaði þess úr ræðu minni. Við, fulltrúar Vinstri hreyfingarinnar -- græns framboðs, höfum hins vegar bæði við þessa umræðu og umræðuna um málefni Landssímans bent á að mikilvægt er fara rækilega í saumana á efnahagslegum afleiðingum þessarar stefnu.
Herra forseti. Ég vil vekja athygli hv. þm. Össurar Skarphéðinssonar á því að hingað til Alþingis er komin hæstv. viðskrh. Það verður fróðlegt að heyra hennar svör, hvernig hún bregst við þeirri yfirlýsingu hæstv. samgrh. um sölu á ríkiseignum, að það sé ekki stefnt að því að ná sem hæstu verði fyrir þessar eignir þjóðarinnar. Þær stangast algerlega á við yfirlýsingar sem áður hafa verið gefnar og verður fróðlegt að fylgjast með því hvernig hæstv. viðskrh. skýrir þau mál eftir því sem umræðunni vindur fram.