Heilbrigðisráðherra (Jón Kristjánsson) (andsvar):
Herra forseti. Varðandi hækkanir umfram það sem hér kveður á um til ákveðinna hópa þá eru ekki áform uppi á þessari stundu um frekari hækkanir. Eins og fram hefur komið er slakað á skerðingu vegna atvinnutekna þannig að það horfir í rétta átt.
Varðandi síðan uppreikning í tengslum við launaþróun almennt þá endurtek ég það sem ég hef áður sagt um það efni, að sá uppreikningur fer fram við gerð fjárlaga hverju sinni og ekki liggur fyrir á þessari stundu hverjar þær upphæðir eða fjármunir til þeirra verða. Þau mál verða tekin fyrir við gerð fjárlaga að hausti.