[prenta uppsett í dálka] 7. fundur, 126. lþ.
Drífa Hjartardóttir:
Herra forseti. Eins og kom fram hjá hæstv. iðn.- og viðskrh., Valgerði Sverrisdóttur er ýmislegt gott verið að gera og margt í farvatninu en betur má ef duga skal. Opinberum störfum fækkar sífellt á landsbyggðinni en þeim fjölgar aftur á móti á höfuðborgarsvæðinu. Ég vek athygli á því að nánast öll miðvinnsla bankanna er flutt til Reykjavíkur sem gæti alveg eins verið úti á landi. Með þeirri miðvinnslu flyst þekking sem tapast aftur á móti á landsbyggðinni. Íslandspóstur hefur fækkað mjög mikið starfsmönnum og gert þjónustuna þar af leiðandi ekki nægilega góða fyrir landsbyggðina. Gagnaflutningurinn þarf að vera á sama verði ef þjónustan á að geta verið góð eins og gert var þegar landið var gert að einu gjaldsvæði í almennri símaþjónustu. Eins þarf það að vera með gagnaflutningana.
