Pétur H. Blöndal (andsvar):
Herra forseti. Hv. þm. fór dálítið út um víðan völl, fór að tala um eitthvað allt annað en bótakerfið en ég ætla ekki að fara út í það. Varðandi það að barnabætur hefðu lækkað að raungildi, eins og hann gat um, þá er það rétt. Þær hafa lækkað að raungildi og krónutölu vegna þess að þær eru tekjutengdar og voru settar á í tíð Alþfl. og Sjálfstfl. sem vildu bæta kjör þeirra sem verst voru settir. Þær voru bæði hækkaðar og tekjutengdar til að bæta kjör þeirra sem verst eru settir. Nú eru bara færri svo illa settir. Það er bara svo einfalt. Tekjur hafa hækkað yfir 20% umfram verðlag. Tekjur á Íslandi hafa hækkað sem aldrei fyrr og það er kannski vandamálið hjá hv. þm., hvað tekjurnar hafa hækkað mikið. Við ættum kannski að lækka þær bara í hvelli til að laga vandann.
Hv. þm. gat um lyfjakostnað. Þar er hann kominn yfir á dálítið málefnalegan grunn. Það skyldi nú ekki vera að þar séu einhverjir agnúar á kerfinu sem finna mætti með því að skoða nákvæmlega einstök dæmi, með því að skoða einstaka öryrkja og einstaka ellilífeyrisþega? Ég hef verið að reyna það og fá menn til að gera einmitt það, ekki að koma með slagorð um það að 10 þúsund manns séu fátækir á Íslandi heldur ræða einstök dæmi.
Þeir sem aðeins hafa strípaða taxta Tryggingastofnunar hafa t.d. aldrei borgað í lífeyrissjóð. Af hverju greiddu þeir ekki í lífeyrissjóð? Annaðhvort vegna þess að þeir voru aldrei á vinnumarkaði eða svikust um það. Á að bæta þeim það upp sem svikust um að borga í lífeyrissjóð og gera jafnréttháa þeim sem borguðu í lífeyrissjóð alla tíð? (ÁRJ: Hvað með allar húsmæðurnar?) Það er óréttlátt.
Ég get svo sem rætt um húsmæður líka. (ÁRJ: Já.) Þær tilheyra ákveðinni kynslóð sem fædd er fyrir 1950 þar sem maðurinn var einn fyrirvinna og lífeyrissjóðirnir eru flestir með ákvæði í reglugerð, sem nú er reyndar komið frá mér, um að taka tillit til þeirra.