[prenta uppsett í dálka] 11. fundur, 126. lþ.
Dómsmálaráðherra (Sólveig Pétursdóttir):
Herra forseti. Ég mæli hér fyrir frv. til laga um dómtúlka og skjalaþýðendur. Frumvarp þetta felur í sér heildarendurskoðun á gildandi lögum um dómtúlka og skjalaþýðendur frá árinu 1914, en þau lög eru nefnd lög um heimild fyrir Stjórnarráðið til þess að veita mönnum rétt til þess að vera dómtúlkar og skjalaþýðendur. Frumvarpið var lagt fram á síðasta þingi en hlaut eigi afgreiðslu. Það er nú lagt fram á ný með nokkrum breytingum á ákvæðum þess um skilyrði til að hljóta löggildingu sem dómtúlkur eða skjalaþýðandi.
Frumvarpið er byggt á tillögum nefndar sem dóms- og kirkjumálaráðherra skipaði árið 1998 til að endurskoða fyrirkomulag prófa til löggildingar dómtúlka og skjalaþýðenda. Nefndin taldi nauðsynlegt að endurskoða gildandi lög sem nú eru komin á níræðisaldur og þarfnast lagfæringar í ýmsum atriðum.
Herra forseti. Ég mun nú í helstu atriðum gera grein fyrir efni frv.
Í 1. gr. frv. segir að með dómtúlk og skjalaþýðanda sé í lögunum átt við þann sem öðlast hefur löggildingu til að annast túlkun fyrir dómi og þýðingu skjala sem hafa réttarlegt gildi. Einnig segir að dómtúlkar og skjalaþýðendur séu opinberir sýslunarmenn og njóti réttar og beri skyldur samkvæmt því.
Í 2. gr. frv. eru sett ákveðin skilyrði til þess að fá löggildingu sem dómtúlkur eða skjalaþýðandi en þau eru að viðkomandi sé svo á sig kominn andlega að hann sé fær um að annast túlkun og þýðingar og hafi staðist próf.
Í 3. gr. frv. eru síðan nánari ákvæði um próf og fyrirkomulag þess.
Í 4. gr. frv. eru nánari ákvæði um löggildingu og störf dómtúlka og skjalaþýðenda. Þar segir m.a. að dómsmrh. skuli halda skrá um þá sem hafi löggildingu sem dómtúlkar og skjalaþýðendur. Með þessu verður unnt að veita upplýsingar fyrir þá sem þurfa á þessari þjónustu að halda og er fyrirhugað að veita aðgang að skránni á heimasíðu ráðuneytisins.
Þá segir í 6. gr. frv. að þeir einir megi nefna sig dómtúlka eða skjalaþýðendur sem hafa til þess löggildingu. Lagt er til að brot gegn þessu varði sektum.
Herra forseti. Ég hef í aðalatriðum rakið efnisatriði frv. og legg til að því verði að lokinni þessari umræðu vísað til 2. umr. og hv. allshn.
