[prenta uppsett í dálka] 14. fundur, 126. lþ.
Flm. (Ágúst Einarsson):
Herra forseti. Ég vil einungis í lok umræðunnar þakka þeim hv. þm. sem hafa tjáð sig um málið. Ens og kom fram í máli hv. þm. Ástu R. Jóhannesdóttur má segja að eðlilegri forsendur séu til að málið nái fram að ganga núna en var fyrir tveimur árum eða svo. Það reynir þá á hinn pólitíska vilja meiri hlutans á hinu háa Alþingi, hvort menn telji að þessi réttarbót nái fram að ganga. Ég treysti því að hv. heilbr.- og trn. láti reyna á það og reyni þá frekar að láta málið koma til afgreiðslu og atkvæðagreiðslu í þingsölum en láta málið daga uppi. Málið er einfalt. Það er ekki flókið mál að fjölga í tryggingaráði um tvo. Og ég þakka hv. þm. Pétri H. Blöndal fyrir stuðning við málið. Ég veit ekki hvort sú afstaða þýðir að þar með sé Sjálfstfl. á móti málinu, en það er kannski ekki rétt, herra forseti, að hafa í flimtingum eins alvarlegt mál og hér er heldur þakka það sem vel er gert. Hv. þm. rökstuddi líka efnislega vel af hverju hann teldi frv. vera til bóta.
Ég legg að lokum áherslu á það enn og aftur, herra forseti, að þingið sem slíkt, og vil beina því til forseta, á að hlutast til um að svona mál, einföld og skýr mál, sem menn geta reyndar haft mismunandi skoðanir á pólitískt, komi aftur úr nefndum og komi þá til atkvæðagreiðslu á hinu háa Alþingi.
