Umhverfisráðherra (Siv Friðleifsdóttir):
Virðulegur forseti. Hv. 17. þm. Reykv. hefur beint tveimur spurningum til mín um þátttöku Íslendinga í 6. þingi aðildarríkja rammasamningsins hjá Sameinuðu þjóunum um loftslagsbreytingar. Fyrri spurningin hljóðar svo, með leyfi forseta:
,,Hver verður tillaga íslensku sendinefndarinnar á 6. þingi aðildarríkja rammasamnings Sameinuðu þjóðanna um loftslagsbreytingar (COP6) sem haldið verður í Haag í nóvember? Hefur tillaga að hinu svokallaða ,,íslenska ákvæði`` breyst frá því að hún var lögð fram á 5. þinginu?``
Því er til að svara að á 4. aðildarríkjaþingi loftslagssamningsins í Buenos Aires í nóvember 1998 lagði Ísland fram tillögu að útfærslu hins svo kallaða íslenska ákvæðis sem er að finna í lokasamþykkt aðildarríkja þingsins í Kyoto sem haldin var réttu ári áður. Þetta ákvæði felur í sér að skoðað verði hvernig taka megi á sérstöðu þeirra ríkja þar sem einstök stóriðjuverkefni geta haft mikil áhrif á heildarlosun vegna smæðar hagkerfis þess ríkis sem í hlut á. Þetta vandamál kom berlega í ljós á lokastigum Kyoto-ráðstefnunnar þegar setja átti Íslandi losunarmörk og leiddi til samþykktar á umræddu ákvæði sem er í raun pólitísk skuldbinding um að taka á þessum vanda.
Tillaga Íslands sem kynnt var á aðildarríkjaþinginu í Buenos Aires felur í sér að losun frá nýjum stóriðjuverum eða stækkun eldri vera sem leiðir til meira en 5% aukningar á heildarlosun í landinu á fyrsta skuldbindingartímabili bókunarinnar, þ.e. 2008--2012, verði haldið utan við losun landsins að uppfylltum ströngum og skýrt tilgreindum skilyrðum eins og hér kom ágætlega fram í máli hv. fyrirspyrjanda. Tillagan hefur verið til umfjöllunar á vettvangi samningsins og verður samkvæmt þeiri verkáætlun sem unnið er eftir tekin til lokaafgreiðslu á 6. þingi aðildarríkja loftslagssamningsins í Haag sem hefst 13. nóvember nk. og mun standa í tvær vikur.
Ísland hefur á síðustu vikum átt í viðræðum við Kanada og nokkur ríki ESB sem hafa látið málið til sín taka í þeirri von að farsæl lausn fáist. Allt bendir til þess að þær viðræður og umfjöllun í undirnefnd aðildarríkjaþingsins í Haag leiði til breytinga á útfærslu lausnarinnar á sérstökum vanda Íslands. Ekki er tímabært að fjalla um það í einstökum atriðum á þessu stigi í hverju slíkar breytingar gætu falist. Endanlegt form ákvörðunar 6. aðildarríkjaþingsins mun ekki liggja fyrir fyrr en á lokastigum þeirrar vinnu.
Það er stefna ríkisstjórnarinnar að Ísland gerist aðili að bókuninni þegar ásættanleg lausn hefur fengist í sérmálum Íslands.
Fyrirspyrjandi spyr, virðulegi forseti, í sinni seinni spurningu:
,,Hyggjast íslensk stjórnvöld taka boði hollensku ríkisstjórnarinnar, sem boðar til sérstakrar ráðstefnu ungs fólks í tengslum við aðildarríkjaþingið og senda fólk á aldrinum 12--18 ára til Haag?``
Því er til að svara að íslenskum stjórnvöldum hefur ekki borist boð um að senda fulltrúa á umrædda ráðstefnu.