[prenta uppsett í dálka] 18. fundur, 126. lþ.
Kristján L. Möller:
Herra forseti. Hér er fyrst og fremst rætt um vanda sveitarfélaga á Vestfjörðum sem hefur skapast þar vegna þess að ríkisvaldið hefur gengið hart fram í því að skerða tekjustofna sveitarfélaga á öllu landinu. Sveitarfélög á Vestfjörðum hafa orðið fyrir sérlega miklu tekjutapi vegna mikillar búseturöskunar sem þar hefur verið, m.a. vegna stjórnvaldsaðgerða við breytingar á fiskveiðistjórnarkerfinu og öðru sem hefur kannski komið einna harðast niður á vestfirskum byggðum.
Herra forseti. Ég tel að hugsanlega sölu vestfirskra sveitarfélaga á eignarhlut sínum í Orkubúi Vestfjarða, sem e.t.v. er ekkert óskynsamleg aðgerð hjá sveitarfélögunum, eigi ekki að tengja skuldum vegna félagslegra íbúða sem margar hverjar voru byggðar þegar mikill uppgangur var á Vestfjörðum. Verði það gert er ríkisvaldið að beita sveitarfélög á Vestfjörðum miklu ofríki með hreinni og beinni eignaupptöku. Sölu á Orkubúi Vestfjarða og vanda félagslega íbúðakerfisins á ekki að blanda saman á þennan hátt.
