Kolbrún Halldórsdóttir:
Virðulegi forseti. Ég þakka hv. fyrirspyrjendum fyrir þessa fyrirspurn sem og aðrar fyrirspurnir sem komið hafa í kippum frá þeim og lúta að jafnréttisstefnu stjórnvalda og jafnréttisáætlun þeirra. Mér þykir ljóst, eftir að hafa hlustað á umræðurnar hér í dag, að hæstv. menntmrh. stendur sig betur en margir aðrir ráðherrar í ríkisstjórninni hvað þetta varðar. Það er greinilegt að margar rannsóknir eru í gangi og margar fyrir frumkvæði menntmrn.
Mig langar hins vegar að skora á hæstv. ráðherra að láta ekki vísbendingar eða niðurstöður nægja heldur láta kné fylgja kviði og setja afl í þá vinnu sem fram undan er, þ.e. finna hvað þurfi að gera til að bæta úr. Vísbendingarnar eru nógar, um vanlíðan drengja í hinu hefðbundna skólakerfi, um allt sem hér hefur verið talið upp. Nú þarf að gera áætlanir um úrbætur. Af því að hér var minnst á Hjallastefnuna þá vil ég upplýsa að a.m.k. fimm leikskólar á Reykjavíkursvæðinu starfa nú eftir Hjallastefnunni.