Drífa Hjartardóttir:
Herra forseti. Það er mjög gleðilegt að öll þessi umræða um menningarhús hefur vakið upp miklar og góðar umræður á landsbyggðinni og hvatt menn mjög til dáða. Það var mjög ánægjulegt að sjá og fá þessa skýrslu núna í hendur og mig langar til þess að nefna að í fjárlagafrv. ársins 2001 er nýr fjárlagaliður undir heitinu Menningarhátíð landsbyggðarinnar, en þar er áætlað 5 millj. kr. á fyrsta ári til þessa verkefnis.
Ég minnist þess hve M-hátíðirnar voru merkilegar á sínum tíma. Ég varð þeirrar ánægju aðnjótandi að fá að taka þátt í slíku verkefni. Eins vil ég geta um annað verkefni sem hefur verið mjög til fyrirmyndar, þ.e. Tónlist fyrir alla, sem hefur verið unnið í samstarfi við grunnskólana og sveitarfélögin.