Kristján L. Möller:
Herra forseti. Ég þakka fyrirspyrjanda, hv. þm. Lúðvík Bergvinssyni, fyrir þá þörfu fyrirspurn sem hér kemur fram. En ég vil nota tækifærið og spyrja hæstv. samgrh. út í það að nýlega mátti lesa í fréttum á viðskiptasíðum að mikil kynning hefur staðið yfir í New York á vegum Kaupþings á ýmsum álitlegum fjárfestingarkostum á Íslandi og voru nefnd fyrirtæki eins og Össur hf., Íslensk erfðagreining, Marel og Landssíminn sem voru þar á kynningarborði fyrir erlendum fjárfestum. Þess vegna vil ég spyrja hæstv. samgrh.: Hefur verið tekin einhver ákvörðun um söluna frekar en það sem við alþingismenn höfum fengið að vita eða er kannski einhver bitasala fram undan á hluta Landssímans til erlendra fjárfesta? Er t.d. búið að undanskilja dreifikerfið? Er það farið frá eða hvað var eiginlega verið að kynna fyrir erlendum fjárfestum?
Við vitum að ágreiningur er í hæstv. ríkisstjórn um þetta og eiginlega spurning líka hvort framsóknarmenn (Forseti hringir.) hafi stutt og styðji slík söluáform og kynningu á erlendri grund á þeim álitlega fjárfestingarkosti sem Landssíminn er.