[prenta uppsett í dálka] 35. fundur, 126. lþ.
Rannveig Guðmundsdóttir:
Herra forseti. Samfylkingin styður að sveitarfélögin fái auknar tekjur, enda hafa þau með höndum afar mikilvæg og vaxandi verkefni. Samfylkingin styður einnig að fasteignaskattar verði lækkaðir á íbúðareigendur á landsbyggðinni. En Samfylkingin telur algjörlega óásættanlegt að sækja eigi stærstan hluta tekjuaukningar sveitarfélaganna í vasa launafólks með hreinni hækkun útsvars. Samfylkingin hefur flutt tillögur um að tekjuskattar ríkisins verði lækkaðir til jafns við auknar heimildir í útsvari, en fyrirliggjandi er neikvæð afstaða stjórnarliða til þeirra.
Í ljósi þessa mun Samfylkingin hvorki styðja megintillögu frv. né bera ábyrgð á að stórfelldum skattahækkunum verði velt yfir á almennt launafólk á sama tíma og ríkisstjórnin er að lækka skatta á söluhagnað stórra fjármagnseigenda. Pólitíska ábyrgð á þessari framkvæmd verður ríkisstjórnin og þingmeirihlutinn á hinu háa Alþingi að bera einn.
