Kristján L. Möller (andsvar):
Virðulegi forseti. Aðeins nokkur orð um jöfnun húshitunarkostnaðar hér á landi. Hv. þm. Arnbjörg Sveinsdóttir gat um það áðan í ræðu sinni. Því miður heyrði ég ekki alveg byrjunina en ég les eins og aðrir í fjárlagafrv. og þeim brtt. sem koma núna að þar er ekki gert ráð fyrir neinni aukningu til að jafna húshitunarkostnað á landinu. Það er miður. Mér sýnist að í því sambandi sé ekki, og miðað við þær tillögur, ætlað að standa við þau fögru fyrirheit sem gefin hafa verið um jöfnun húshitunar á landinu. Það er rétt sem hv. þm. sagði að í fjárlagafrv. er fjallað um niðurgreiðslu á rafhitun. Ég vek athygli á því, herra forseti, að í nefndaráliti meiri hluta iðnn. leggur nefndin til að í framtíðinni þurfi að skoða að breyta þessu orðalagi úr niðurgreiðslu á rafhitun í niðurgreiðslu á húshitun. Það var einmitt það sem nefnd forsrh., sem var þverpólitísk nefnd, sem skilaði samhljóða áliti um að það ætti að jafna húshitunarkostnað í þremur jöfnum áföngum á næstu þremur árum, árið 2000, árið 2001 og 2002.
Í fyrra var aðeins bætt í, þó ekki nóg, og niðurgreiðslur auknar. Í tillögunni núna er ekki gert ráð fyrir því að auka þessa niðurgreiðslu.
Herra forseti. Í gögnum sem ég hef undir höndum kemur fram að niðurgreiðsla rafhitunar á svæðum Rafmagnsveitna ríkisins sé um 73 þús. kr. með virðisaukaskatti. Hjá öðrum aðilum sem nota hitaveitur eins og á Akranesi, Borgarnesi, Siglufirði, Akureyri eða hjá Hitaveitu Rangæinga er kostnaðurinn töluvert hærri. Þess vegna vil ég spyrja hv. þm.: Hvað á að gera við dýru hitaveiturnar?