[prenta uppsett í dálka] 37. fundur, 126. lþ.
Ísólfur Gylfi Pálmason (andsvar):
Herra forseti. Það fer ekki mikið fyrir víðsýninni hjá þessum hv. þm. Hann vitnaði m.a. í gærur í ræðu sinni. (Gripið fram í: Gærur?) Það vill þannig til að hv. þm. er einmitt að verða þingmaður í kjördæmi þar sem skinnavinnsla er mjög mikil. Og það vill þannig til að á Akureyri eru 130 störf í skinnaiðnaði. Og ekki nóg með það. Það verður eins milljarðs virðisauki einmitt í skinnaiðnaðinum. Og svo tekur hann þennan málaflokk eins og þetta sé alveg sérstakur málaflokkur og að eitthvað sérstakt sé við það að ríkið sé að styrkja skinnaiðnað o.s.frv.
Ég tók eftir öðru í ræðu hv. þm. Hann talar mikið um fasteignaskattana. Ég veit að hv. þm. er ágætlega að sér í sveitarstjórnarmálum og hann veit líka að þau viðmiðunarmörk sem notuð eru varðandi fasteignaskattana hafa farið mjög fyrir brjóstið á sveitarstjórnarmönnum. Ég er þess fullviss að fasteignaskattar munu lækka á landsbyggðinni.
En hv. þm. talar ekkert um brtt. Samfylkingarinnar um það að hækka skatta í landinu. Hann kemur ekki með neitt reiknilíkan um hvað það þýði fyrir hinn almenna borgara. Hann getur kannski svarað því.
