Steingrímur J. Sigfússon:
Herra forseti. Þessi grein hefur að geyma skerðingarákvæði þau sem valda því að í stað þess að Framkvæmdasjóður fatlaðra og Endurbótasjóður menningarbygginga njóti tekjustofna sinna að fullu renni verulegur hluti tekna þeirra í ríkissjóð. Við erum andvíg þessum skerðingum og teljum fulla þörf fyrir þá fjármuni til þeirra verkefna og þess uppbyggingarstarfs sem þessum sjóðum er ætlað að sinna, einkum og sér í lagi á það við um Framkvæmdasjóð fatlaðra. Sú harkalega útreið sem sá sjóður sætir við afgreiðslu fjárlaganna að tillögu meiri hlutans er óverjandi í ljósi þeirra brýnu verkefna sem sjóðurinn á að sinna, í ljósi langra biðlista eftir vistunarúrræðum fyrir fatlaða, í ljósi þess að allt of hægt miðar við að bæta úr um aðgengismál fatlaðra og sinna öðrum slíkum verkefnum sem framkvæmdasjóðurinn á að gera.
Við erum því andvíg þessum skerðingum og leggjum til að heimildir til þeirra falli brott.