Ögmundur Jónasson (andsvar):
Herra forseti. Í grundvallaratriðum er ég ekki ósammála hæstv. forsrh. en út frá hagsmunum fatlaðra er ég honum hins vegar ósammála. Það er rétt sem hann bendir á að þessi tekjulind hefur verið hagstæð trygging fyrir fatlaða upp á síðkastið. Einmitt þess vegna spyr maður hvort rétt sé að nema úr gildi og skera á þessa hagstæðu tryggingu sem fatlaðir hafa notið. Ég er að mótmæla því.
Ríkisstjórninni hefur hins vegar fundist óþægilegt að standa frammi fyrir því á ári hverju að skerða þetta lögboðna framlag til málefna fatlaðra. Þess vegna segi ég að þetta frv. sé pólitískt í eðli sínu. Ríkisstjórnin vill koma málum þannig fyrir að hún geti skorið niður framlag til þessara málaflokka án þess að mikið fari fyrir því og ég mótmæli þeirri aðferð.