Hjálmar Árnason:
Herra forseti. Umræða innan Evrópusambandsins um allsherjarbann á notkun mjöls í fóður var byggð á röngum forsendum. Með hörðum viðbrögðum utanrrn. tókst að koma réttum upplýsingum í umræðuna með jákvæðum afleiðingum fyrir íslenska þjóð. Lyktum þessa máls ber að fagna svo langt sem það nær.
En nú eru fleiri blikur á lofti. Á fundi hv. sjútvn. í morgun með fulltrúum mjölframleiðenda á Íslandi kom m.a. fram að til umræðu er innan Evrópusambandsins að banna notkun fiskimjöls vegna of hás díoxíninnihalds sjávarfangs. Þar virðist umræðan, herra forseti, líka á villigötum. Hún er byggð, eins og fram kom í máli hæstv. utanrrh., á ástandi sjávar í Evrópu að meðaltali og þá lagt að jöfnu ástand sjávar hér við Ísland og t.d. í Norðursjó og er sannarlega ólíku saman að jafna.
Hér er um að ræða svo alvarlegt mál að það kynni jafnvel að leggja efnahag Íslendinga í rúst. Ef ekki verður heimilt að nýta fiskimjöl úr íslensku sjávarfangi vegna díoxíns hljóta menn að spyrja um næstu skref. Verður þá hið sama á síðari stigum látið gilda um þorskinn og annað sjávarfang almennt? Um afleiðingar þess þarf ekki að fara mörgum orðum. Það þýddi einfaldlega hrun í efnahagslífi og atvinnulífi Íslendinga.
Ég lýsi ánægju minni með festu hæstv. utanrrh. og ríkisstjórnar í mjölmálinu. Ég treysti því jafnframt að allt verði gert sem fært er til að koma réttum upplýsingum á framfæri við þá aðila innan Evrópusambandsins sem véla um örlög efnahagslífs okkar á grundvelli díoxíns. Ég fagna frumkvæði hæstv. sjútvrh. um sýnatöku á díoxíni. Það er brýnt að við látum gera strax markvissa úttekt á ástandi sjávar við Íslandsstrendur og komum réttum upplýsingum á framfæri við umrædda aðila. Við getum ekki látið rangar upplýsingar þeirra setja efnahagslíf okkar í uppnám.