[prenta uppsett í dálka] 40. fundur, 126. lþ.
Fjármálaráðherra (Geir H. Haarde) (andsvar):
Herra forseti. Hv. þm. kemur sér hjá því að svara af hverju hann lagði ekki til að persónuafsláttur yrði hækkaður við hækkun útsvarsins í fyrra hjá Reykjavíkurborg sem hækkaði staðgreiðsluálaginguna hjá öllum landsmönnum. (Gripið fram í.) Af hverju gerði þingmaðurinn það ekki? Það hefði hann betur gert.
Það sýnir bara í hnotskurn að ekki er hægt að ætlast til að við í þessum sal höfum slíkt eftirlit með öllum ákvörðunum sem teknar eru á vettvangi sveitarfélaganna. Þau verða að fá að taka ákvarðanir sínar sjálf og til þess eiga þau að hafa rúmt svigrúm. Ef þau vilja veita betri þjónustu á þessu sviði heldur en eitthvert annað sveitarfélag þá finnst mér ekkert athugavert við að þau geti gert það og geri það þá innan tekjuöflunarmöguleika sinna.
