Halldór Blöndal:
Herra forseti. Það hefur löngum verið um það rætt og því haldið fram að samkomulag hafi verið gert um að leggja niður framleiðslu kísilgúrs við Mývatn. Hið rétta í málinu er að náð var samkomulagi um það að ríkisstjórnin legði fram á Alþingi frv. þar að lútandi. Það frv. náði ekki fram að ganga einfaldlega vegna þess að Alþingi féllst ekki á það samkomulag sem rætt hafði verið um milli umhvrh. og náttúruverndarsamtaka á þeim tíma. Það var því þannig að Alþingi hafnaði því samkomulagi sem fitjað hafði verið upp á. Þess vegna er alveg ástæðulaust og ber allra síst í sölum Alþingis að halda því fram að eitthvað hafi verið gert sem á Alþingi hefur verið hafnað.