[prenta uppsett í dálka] 45. fundur, 126. lþ.
Arnbjörg Sveinsdóttir:
Hæstv. forseti. Ég vek athygli á því að hér er verið að greiða atkvæði um 30 millj. kr. fjárveitingu til þess að sinna framboði á námi á háskólastigi í Austurlandi og Vestfjörðum í samræmi við þingsályktun um stefnu í byggðamálum. En þessi fjárveiting er einnig ætluð til þess að styrkja fræðslumiðstöðvar vegna kostnaðar þeirra vegna mikilla fjarlægða og fjarskiptakostnaðar og auk þess er heimilt að styrkja fámenn byggðarlög til kaupa á fjarnámsbúnaði. Hér er um ánægjulegt og stórt skref að ræða í menntamálum þjóðarinnar. Hér er einnig um stórkostlegt byggðamál að ræða og það á einnig við liðinn sem við greiðum atkvæði næst um að þar er verið að festa í sessi fræðslumiðstöðvar landshlutanna sem nú þegar hafa ótvírætt sannað gildi sitt.
