Árni Steinar Jóhannsson:
Virðulegi forseti. Þannig er komið í raforkumálum á Íslandi að sífellt minnkandi framlög ríkisins til Rafmagnsveitna ríkisins gera það að verkum að stoðkerfi landsbyggðarinnar er borið uppi nánast af öflugustu byggðakjörnunum úti á landi.
Öflugustu byggðakjarnarnir hér á suðvesturhorninu og á Akureyri eru stikkfrí varðandi stoðkerfi landsins í raforkumálum. Það er bráðnauðsynlegt að efla dreifikerfið í sveitum og nú liggja fyrir stórverkefni á vegum Rafmagnsveitna ríkisins, m.a. lína frá Egilsstöðum og niður á Eskifjörð.
Rafmagnsveitur ríkisins þurfa 400--700 millj. kr. í framlag frá ríkinu eða aðrar úrlausnir og því leggjum við til, ég og hv. þm. Guðjón A. Kristjánsson, að framlag verði aukið um 180 millj. til að styrkja dreifikerfi í sveitum þannig að samtals séu veittar 318 millj. til Rafmagnsveitna ríkisins til þess að standa straum af stoðkerfi landsins í hinum dreifðu byggðum.