[prenta uppsett í dálka] 46. fundur, 126. lþ.
Samgönguráðherra (Sturla Böðvarsson):
Herra forseti. Ég geri ráð fyrir að þær framkvæmdir sem ég nefndi hafi ekki komið hv. þm. á óvart að gætu verið þær framkvæmdir sem mundi verða að hægja á. Ástæður eru margvíslegar og skilyrðin fyrir því að við teljum forsvaranlegt að hægja á þeim framkvæmdum eru mikil spenna í efnahagslífinu, ekki síst á höfuðborgarsvæðinu en jafnframt á það við um verktakamarkaðinn almennt þannig að á það allt saman verður að líta. En ég vil bara undirstrika það sem ég sagði áðan að ástæðan fyrir því að ég hef ekki borið fram tillögu til breytinga á vegáætluninni er að það eru mjög mörg verk sem eru í undirbúningi og er verið að vinna að á vegum Vegagerðarinnar sem mun verða að seinka af þeim ástæðum að undirbúningi hefur ekki nægilega miðað áfram og á það bæði við um skipulagsmálin og einnig umhverfismatið.
