Steingrímur J. Sigfússon:
Herra forseti. Hér er verið að leggja til að lækka skatthlutfall á söluhagnaði hlutabréfa umfram tiltekin mörk úr almennu hlutfalli niður í 10%. Segja má með sanni að þetta sé jólagjöfin í ár til þeirra sem ríkisstjórnin hefur helst talið að þyrftu á slíkri heimsendingu að halda, þ.e. stærstu fjármagnseigenda í landinu. Með þessu er Ísland að skipa sér í algera sérstöðu hvað varðar skattlagningu á gróða manna í slíkum viðskiptum. Í öllum löndum í kringum okkur er þetta skatthlutfall til muna hærra, oft þrepaskipt og hlutfallið á bilinu 20--40%. Hér er verið að búa til sérstakt gósenland fyrir þá sem hafa umtalsverðan gróða af hlutabréfaeign og arð af fjármagnstekjum. Það má vera mönnum umhugsunarefni í ljósi þess hvernig búið er að ýmsum öðrum hópum í samfélaginu.
Ég lýsi því yfir fyrir mína hönd, herra forseti, að baráttu minni fyrir því að þarna sé komið á eðlilegri skattlagningu er ekki lokið.