[prenta uppsett í dálka] 57. fundur, 127. lþ.
Arnbjörg Sveinsdóttir:
Hæstv. forseti. Frv. sem við ræðum hér kemur fram nánast óbreytt frá síðasta þingi. Eingöngu 43. gr. tók breytingum á milli þinga. Félmn. ákvað að taka málið til umfjöllunar í þinghléi í sumar og fékk fjölda aðila til að ræða það og átti ágæta vinnudaga þar sem farið var yfir efni frv. Hins vegar er margt órætt enn þá.
Ég ætla í sjálfu sér ekki að fara í efnislega umræðu um málið sem stendur heldur vil ég þakka fyrir góðar umræður og ábendingar sem komið hafa fram.
Í frv. eru nokkur álitaefni sem nefndin mun fara yfir í störfum sínum. Ég vildi eingöngu óska eftir góðu samstarfi nefndarmanna, sem ég veit að verður. Því hefur verið lýst yfir í umræðunni. Samstarfið þarf að vera gott þar sem þetta er býsna viðamikið efni og við verðum að ætla okkur góðan tíma í það.
