[prenta uppsett í dálka] 60. fundur, 127. lþ.
Jón Bjarnason (andsvar):
Herra forseti. Það kemur þá bara greinilega fram að okkur greinir verulega á í ábyrgum vinnubrögðum, og hvernig þau skuli vera við lagasetningar frá Alþingi og í störfum nefndar, þegar svo veigamikið mál eins og hér er um að ræða er afgreitt út úr nefnd í einhverjum sérstökum flýti og litið svo á að það sé nóg að meiri hlutinn hafi fjallað um það og komist að þessari niðurstöðu, og minni hlutanum komi það ekkert við og ekki þurfi að fjalla um þetta mál í heild sinni á vegum nefndarinnar. Þarna greinir okkur einfaldlega á í vinnubrögðum og það má vel vera, herra forseti, að einmitt svona vinnubrögð séu kannski talandi tákn og lýsandi fyrir þann flumbrugang og vandræðagang sem er því miður í flugöryggismálum og flugumferðarmálum hér á landi.
Ég ítreka, herra forseti, og legg aftur til að hv. formaður samgn. sjái sóma nefndarinnar í því að þetta mál fari aftur í nefnd þar sem við getum þá fjallað um það aftur og tekið efnislega umræðu um þau atriði og ábendingar sem bæði minni hlutinn og gestir vildu koma á framfæri við lokaafgreiðslu frv.
