[prenta uppsett í dálka] 62. fundur, 127. lþ.
Jón Bjarnason (andsvar):
Herra forseti. Við í Vinstri hreyfingunni -- grænu framboði viljum í sjálfu sér miklu frekar horfa fram á veginn og skoða hvernig takast megi á við verkefni framtíðarinnar en ekki velta okkur í mistökum einstakra þingmanna, t.d. á Eyjafjarðarsvæðinu sem horfðu á stóriðjudrauma þar. Ég vona að hv. 1. þm. Norðurl. e. hafi átt hlut að máli í að blása af þessa stóriðjudrauma í Eyjafirði til að hægt yrði að takast á við uppbyggingu Háskólans á Akureyri í staðinn.
Herra forseti. Ég vona líka, ef hv. 1. þm. Norðurl. e. verður einnig þingmaður á Austurlandi, að hann sjái einnig --- ég vona að hann hafi átt hlut að þeirri stefnubreytingu sem varð í Eyjafirði --- af eigin raun að Austurlandi hefur verið haldið í vissri spennitreyju vegna stóriðjudrauma í staðinn fyrir að þar hefði fyrir löngu átt að vera búið að ráðast í jarðgöng, t.d. á milli Fáskrúðsfjarðar og Reyðarfjarðar, þ.e. ef tekið hefði verið á af myndarskap.
Vonandi sjáum við það líka gerast á Austurlandi með hliðstæðum hætti og í Eyjafjarðarsveit, bæði í Eyjafirði og á Akureyri, að þar byggist upp blómlegt mannlíf og miklar væntingar og vonir í kringum annað en stóriðju. Ég vona svo sannarlega að 1. þm. Norðurl. e. láti ekki sitt eftir liggja og byggi upp blómlegt atvinnulíf byggt á traustum íslenskum grunni á Austurlandi.
