[prenta uppsett í dálka] 62. fundur, 127. lþ.
Flm. (Hjálmar Árnason):
Herra forseti. Ég mæli hér fyrir till. til þál. um áframeldi á þorski. Flutningsmenn eru auk mín hv. þm. Ísólfur Gylfi Pálmason, Kristinn H. Gunnarsson og Magnús Stefánsson.
Herra forseti. Hér er um endurflutning á þáltill. að ræða. Málið var flutt í fyrra en ekki vannst tími til að afgreiða það og er það því endurflutt núna.
Þingsályktunin er svohljóðandi:
,,Alþingi ályktar að Hafrannsóknastofnuninni verði heimilað í tilraunaskyni að úthluta allt að 500 lesta þorskkvóta árlega næstu fimm árin til áframeldis á veiddum þorski. Þessum aflaheimildum verði skipt í sjö jafna hluta og dreift um landið til einstaklinga. Jafnframt verði Hafrannsóknastofnuninni falið að skrá og fylgjast með tilrauninni og birta niðurstöður um reynslu tímabilsins.``
Herra forseti. Rök fyrir þessu eru færð í greinargerð. Einnig má vísa til þeirrar umræðu sem fram hefur farið, m.a. í fjölmiðlum, um þá miklu þróun sem á sér stað og þá miklu möguleika hérlendis sem annars staðar í þorskeldi. Þess vegna er þáltill. þessi flutt. Ég mælist því til þess að henni verði vísað til hv. sjútvn.
