[prenta uppsett í dálka] 74. fundur, 127. lþ.
Jóhann Ársælsson (andsvar):
Hæstv. forseti. Þannig er að fyrirtækið sem verið er að tala um að byggja fyrir austan er svo stórt að það er mjög erfitt fyrir menn að átta sig á hvers konar starfsemi er þar fram undan. Ég held t.d. að skipaumferðin í kringum þetta verði gífurleg.
Nú þegar er Grundartangahöfn ein af allra mestu flutningahöfnum landsins. Menn geta því séð að álverið fyrir austan mun kalla á gífurlega skipaflutninga. Hvort menn hafa skoðað þau mál nægilega vel, sem fylgja því að hafa þetta fyrirtæki svona gífurlega stórt, skal ég ekki segja um. Þetta hefur samt allt saman fengið stimplana og við verðum að vona að mönnum hafi lánast að fara það skynsamlega yfir þessa hluti að mark sé takandi á þeim stimplum.
