Fyrirspyrjandi (Þórunn Sveinbjarnardóttir):
Herra forseti. Ég þakka hæstv. utanrrh. svörin. Það liggur sem sagt fyrir að viðræður hafa ekki hafist, og bókunin rann náttúrlega út fyrir 10 mánuðum eins og fram kom í máli mínu. Maður hlýtur að velta fyrir sér hvaða áhrif það hafi í raun á stöðu samskipta þessara tveggja þjóða og hvort hæstv. utanrrh. telji ekki brýnt að gengið verði til þessara viðræðna sem fyrst. Ef ekki ber sérlega mikið í milli ríkisstjórnanna tveggja hygg ég að samningur um útfærsluna á bókuninni ætti ekki að taka mjög langan tíma.
Einnig þætti mér vænt um að fá að heyra frá hæstv. utanrrh. hvenær hann telji að viðræður geti hafist eða muni hefjast.