[prenta uppsett í dálka] 77. fundur, 127. lþ.
Kolbrún Halldórsdóttir:
Herra forseti. Ég fagna þeim jákvæða tóni sem var í ræðu hæstv. heilbrrh. í garð þeirrar till. til þál. um stöðu óhefðbundinna lækninga sem liggur fyrir þinginu og er einmitt til afgreiðslu í hv. heilbrn. um þessar mundir.
Það er alveg ljóst að hér eru stundaðar óhefðbundnar lækningar. Í sjálfu sér má segja að þær séu sjálfsagður þáttur í heilsuvernd nútímamannsins. Verulegu máli skiptir að vitað sé hvaða greinar er verið að stunda og að möguleiki sé fyrir heilbrigðiskerfið að eiga þar einhverja aðkomu. Við getum einungis tekið á málum af alvöru þegar við erum búin að kortleggja stöðuna og gera okkur grein fyrir hvað við viljum að verði skoðað í þessum efnum.
Þess vegna tel ég mjög brýnt að tillagan verði afgreidd úr heilbrn. hið fyrsta þannig að Alþingi geti á þessu vori gengið svo frá málum að sú könnun sem tillagan lýtur að verði framkvæmd.
