Kolbrún Halldórsdóttir:
Herra forseti. Ég tek undir þakkir þær sem hér hafa verið látnar í ljós og fagna sérstaklega yfirlýsingu hæstv. umhvrh. um að náttúruverndaráætlun verði lögð fyrir Alþingi í haust.
Það er kannski ekki sanngjarnt í stuttri athugasemd að varpa fram spurningu en ég leyfi mér samt að varpa henni hér fram, svona yfir salinn. Það kom fram í máli hæstv. umhvrh. að það væri ekki tekið fram í friðun Breiðafjarðar að friðunin næði til hafsbotnsins. Væri kannski verkefni fyrir Alþingi að sjá til þess að svo verði? Ég tel einsýnt að hafsbotninn í kringum eyjarnar sé jafnmikils virði og eyjarnar sjálfar. Ég held að það sé sjálfsagt mál og kannski skylda alþingismanna að sjá til að friðunin nái alveg niður á botn.