Dómsmálaráðherra (Sólveig Pétursdóttir) (andsvar):
Herra forseti. Menn telja sig ekki vera á gráu svæði í þessu frv. Það er einmitt fjallað mjög ítarlega um þessi mannréttindaákvæði í grg. af ásettu ráði svo að ekki fari á milli mála að hér sé rétt staðið að verki.
Það er ekki að ástæðulausu að nágrannaþjóðir okkar, Norðurlandabúar, Bretar, Þjóðverjar og Hollendingar, hafa sambærileg ákvæði í lögum. Reynsla þeirra er sú að afar mikilvægt sé að koma í veg fyrir að menn skáki í skjóli þess að ekki sé hægt að bera á þá kennsl við þær aðstæður sem hér er um að ræða, ekki síst vegna þess að þekkt er að sjálfstraust óeirðarseggjanna eykst eftir því sem þeir telja minni líkur á að lögreglan geti tekið þá höndum. Við vitum að þótt margir sem taka þátt í mótmælafundum hafi ekkert ófriðlegt í hyggju á það alls ekki við um alla. Sumir mæta til leiks beinlínis til að valda usla. Eins og dæmin sanna frá mótmælum í Gautaborg, Genúa og víðar geta afleiðingarnar orðið skelfilegar ef ekki tekst að halda þeim í skefjum.
Rétt er að geta þess að Svíar lögfestu einmitt sambærilegt ákvæði og hér er til umfjöllunar eftir atburðina í Gautaborg sem ég vænti að mönnum séu enn í fersku minni. Reynslan sýndi þeim að á slíkri reglu væri þörf.