Kristinn H. Gunnarsson (andsvar):
Herra forseti. Ég hygg að hv. þm. sé að vísa til framtíðarsýnar sveitarfélaga á höfuðborgarsvæðinu til líklega um tuttugu ára eða svo. Þar er gert ráð fyrir mjög mikilli fjölgun --- ég man ekki tölurnar svo glöggt í þessu svæðisskipulagi en mig minnir að gert sé ráð fyrir fjölgun um 60 þús. manns á einhverju árabili, tuttugu eða þrjátíu árum, og af því stafi helmingurinn af aðflutningi fólks af landsbyggðinni inn á höfuðborgarsvæðið. Og ég er út af fyrir sig alveg sammála honum og fleiri sveitarstjórnarmönnum á landsbyggðinni sem hefur brugðið dálítið við þessa framtíðarsýn. Hún er kannski ekki svo vitlaus eða óraunhæf í ljósi liðins tíma en nú eru hins vegar uppi önnur viðhorf eins og fram kemur í afstöðu ríkisstjórnarinnar. Hlutir eru breytanlegir og þróunin er ekkert lögmál heldur er hægt að breyta þessari framtíðarsýn.