[prenta uppsett í dálka] 84. fundur, 127. lþ.
Dómsmálaráðherra (Sólveig Pétursdóttir):
Herra forseti. Ég vil þakka hv. fyrirspyrjanda fyrir að vekja máls á þessum þætti í fangelsismálum og hv. þingmönnum fyrir ábendingar þeirra við þessa umræðu.
Það er óneitanlega áhyggjuefni hve vímuefni koma oft við sögu í alvarlegum afbrotum. Meðferð getur því í mjög mörgum tilfellum verið lykilatriði svo brotamaður geti breytt um lífsstíl og komið sér á réttan kjöl að afplánun lokinni. Þetta skiptir því verulegu máli fyrir þá einstaklinga sem í hlut eiga og þjóðfélagið allt.
Ég tel rétt að skoðaðar verði nýjar áherslur í fangelsismálum og hef lagt drög að því að endurskoðuð verði núgildandi löggjöf um fangelsi og fangavist. Ég bind líka vonir við að nýtt gæsluvarðhaldsfangelsi sem til stendur að reisa á höfuðborgarsvæðinu, þar sem gert er ráð fyrir bæði móttöku og greiningu, geti orðið til mikilla bóta í þessu sambandi.
