Félagsmálaráðherra (Páll Pétursson):
Herra forseti. Auðvitað eru vafaatriðin mörg og ástæða til þess að velta vöngum yfir mörgum atriðum í sambandi við húsaleigubætur, þ.e. hvenær eigi að greiða þær og hvenær ekki. Nú nýlega kom t.d. upp umræða í þjóðfélaginu um að verið sé að mismuna námsmönnum sem leigja eitt herbergi og fá ekki húsaleigubætur eða námsmönnum sem búa á stúdentagörðum. Námsmenn hafa að vísu þann möguleika ef þeir ekki komast inn á stúdentagarða að slá sér saman og leigja saman fullkomna íbúð. En það er erfitt að komast fyrir öll nes í þessu efni. Mörg tilvik eru þannig vaxin.
Bara svo menn hafi hugmynd um hvaða upphæðir við erum að tala vil ég segja að ef árstekjur viðkomandi eru 1 milljón þá fá þeir 11 þús. kr. í húsaleigubætur á mánuði. Ef þeir eru með eitt barn fá þeir 18 þús., þ.e. viðbót upp á 7 þús. kr. En ef þeir eru með tvö börn eða þrjú fá þeir til viðbótar þessum 11 þús. 9 þús. kr. Ef viðkomandi er með 2,2 millj. í árstekjur fær einstaklingurinn 9 þús. Ef hann er með eitt barn fær hann 7 þús. kr. meira og 9 þús. kr. meira ef hann er með tvö.