Jón Bjarnason:
Virðulegi forseti. Ég hygg að þetta sé í fyrsta skipti sem hæstv. menntmrh. Tómas Ingi Olrich tekur til máls sem ráðherra og ég vil óska honum farsældar í starfi.
Ég vil áfram ítreka það að allmargir framhaldsskólar, sérstaklega þeir sem eru með verklegt nám og þeir sem eru með heimavistir, bera mjög skarðan hlut frá borði í reiknilíkaninu eins og sakir standa, og bitnar nú þegar orðið á kennslu þeirra og námsframboði. Auk þess sem þessir skólar bera skuldir frá fyrri árum eru þeir jafnframt með mjög veikan rekstrargrunn til starfans. Ég get nefnt dæmi úr Menntaskólanum í Kópavogi sem er með hótel- og veitinganám, og honum er ætlaður sami hlutur í matvælakaup eins og um almennan skóla væri að ræða. Hver og einn sem ber hag menntunar fyrir brjósti sér að þetta ráðslag gengur ekki upp og verður að leiðréttast.