Margrét Frímannsdóttir (andsvar):
Virðulegi forseti. Ekki er það nú þannig að bensínafgreiðslumennirnir eða þeir sem afgreiða í matvöruverslununum séu að telja pillurnar. En pillurnar eru afgreiddar frá lyfjafræðingum og sendar í viðkomandi söluskála eða verslun og afgreiddar þaðan. Hver fær sinn skammt og er hann merktur einstaklingum. Það sem ég á við er að þetta liggur í afgreiðsluborðinu í pappakössum og við vitum svo sem ekkert hvers konar lyf þetta eru. Það gæti einhver viljað taka þetta. Mér finnst það ekki beint bera vitni um öryggi í lyfjaafgreiðslu að hafa þetta svona og eðlilegt væri að lyfsalar gengju þannig frá því þegar þeir eru með afhendingarstaði annars staðar en í lyfjaverslunum, að þá sé a.m.k. um einhvers konar skápa, öryggisgeymslu að ræða þar sem lyf eru afhent. Auðvitað veit ég að afgreiðslufólk reynir að passa upp á lyf. En það þarf bara að gera margt annað þegar þetta er afgreitt í matvöruverslunum og í söluskálum. Þetta er ekkert nýtt. Þetta hefur verið svona í mörg ár. Þetta er sú lyfjaafgreiðsla sem ég t.d. þekki best úr heimabyggð minni.