Heilbrigðisráðherra (Jón Kristjánsson) (andsvar):
Herra forseti. Ég hef í raun engu við þetta að bæta að öðru leyti en því að ég ítreka að einboðið er að fara yfir þær öryggiskröfur sem gerðar eru í þessu og m.a. það sem hv. þm. nefndi, þ.e. að geymsla pakkninga og lyfja sem hafa verið tekin til í lyfjabúðum og send, sé traust. Ég tek þessari ábendingu og endurtek að ég mun spyrjast fyrir um þann hátt sem hafður er á í þessu efni.