[prenta uppsett í dálka] 97. fundur, 127. lþ.
Guðjón A. Kristjánsson:
Herra forseti. Hér væri auðvitað fullt tilefni til þess að hefja þó nokkra umræðu um rannsóknastarfsemi í landinu almennt á vegum ríkisins og stofnana þess en þó sérstaklega um þær áherslur sem hafa á undanförnum árum verið lagðar á það að þessar rannsóknastofnanir skuli standa að störfum sérstaklega varðandi það að afla sértekna, hins svokallaða sjálfsaflafjár. Ég held að ekki væri vanþörf á að skoða ofan í kjölinn hvernig rannsóknastofnanir á vegum ríkisins hafa orðið í sífellt meira mæli að stefna að því að ná sér í svokallað sjálfsaflafé sem hefur að sumu leyti komið niður á rannsóknastarfsemi þeirra. Þessi umræða klárast örugglega ekki við þessari stuttu athugasemd hér. En ég held að þetta sé kannski meginefni máls.
