[prenta uppsett í dálka] 104. fundur, 127. lþ.
Gunnar Birgisson (andsvar):
Virðulegi forseti. Hæstv. ráðherra kom inn á einkaframkvæmd og ræddi aðeins um hana. Það er náttúrlega engin spurning að ég er alls ekki á móti þeirri aðferð þar sem hún á við. En spurningin er hvort menn vilji fá framkvæmdirnar eða mannvirkin strax og greiða þá mismun í vöxtum, sem getur verið allverulegur.
En af því að hæstv. ráðherra talaði um íþróttamiðstöð í Grafarvogi þá hafa þeir valið þá leið að fara einkafjármögnunarleiðina með einkaframkvæmdina. En það er annað íþróttahús, kannski ekki alveg eins stórt og í Reykjavík, sem er að rísa í Kópavogi, og þar borga menn það út úr rekstri þess sveitarfélags. Þetta er því allt spurning um hvernig menn reka sveitarfélög sín og hvað er í tekjuafgang. Ef þau geta byggt þá eiga þau að gera það en greinilega hefur Reykjavík ekki átt fyrir þessu og þurft að fara þessa leið.
