Utanríkisráðherra (Halldór Ásgrímsson) (andsvar):
Herra forseti. Það er fullkomlega eðlilegt að hv. þm. hafi sína skoðun á þessu máli og taki afstöðu til þess. Ég tel rétt hjá honum að við Íslendingar höfum ekki verið leiðandi í þessari þróun um einkavæðingu fjarskiptamarkaðarins. Það er hins vegar staðreynd að þessi fyrirtæki hafa verið seld til einkaaðila í mjög miklum mæli og því hefur þessi þróun orðið. Menn geta síðan haft sínar skoðanir á því. Þarna hafa orðið gífurlegar breytingar sem við Íslendingar höfum þurft að taka mið af og það er náttúrlega fyrst og fremst vegna þessara gífurlegu breytinga, þessara miklu tækniframfara og breytinga í alþjóðafjarskiptum sem við ætlum okkur að fara í svipað kjölfar og aðrar þjóðir, þó að rétt sé að taka það fram að við höfum stigið þau skref af mun meiri varkárni en flestar aðrar þjóðir í kringum okkur.