Halldór Blöndal (andsvar):
Herra forseti. Það sem gefur mér tilefni til að veita andsvar við ræðu hv. 4. þm. Austurl., Einars Más Sigurðarsonar, er að hann minntist á till. til þál. um hálendisþjóðgarð og vekur athygli að þingmaður Samfylkingarinnar á Norðurl. e. er ekki meðal flutningsmanna sem ekki er að undra þar sem gert er ráð fyrir að kljúfa Mývatnsöræfi í tvennt og svæði Jökulsár á Fjöllum. Gert er ráð fyrir að hálf Mývatnsöræfi, hluti af Útbruna eigi að vera í þjóðgarðinum en ekki neðri hluti Jökulsár á Fjöllum og talað um að á þessu svæði sé sérstök ástæða til að beitarnýting verði sem minnst skert og bændur geti haldið áfram að nýta beitarlönd á því svæði og þannig styrkt hefðbundinn landbúnað að því er mér skilst í Mývatnssveit og Bárðardal. Nú hygg ég að þessi tillaga sé á miklum misskilningi byggð, herra forseti.