Fjármálaráðherra (Geir H. Haarde) (andsvar):
Herra forseti. Ég vil bara ítreka enn vegna þess að hv. þm. er að reyna að hnykkja á ummælum mínum að því er varðar bráðabirgðalög að um slíkt eru engar fyrirætlanir þegar kemur að því að þessi lög renna úr gildi í lok júní. En hvorki ég né nokkur annar maður getur tekið bráðabirgðalagavaldið frá ríkisstjórninni með yfirlýsingu á Alþingi. Það þarf að liggja alveg fyrir. Það get ég ekki gert. Það getur enginn maður gert. Það vald er ríkisstjórninni falið í stjórnarskrá.